OTFRIDUS UUIZANBURGENSIS MONACHUS HARTMUATE ET UUERINBERTO SANCTI GALLI MONASTERII MONACHIS. Oba ih thero buacho guati hiar iauuiht missikerti, gikrumpti thero redino, thero quit ther euangeliO: Thuruh Kristes kruzi bimide ih hiar thaz uuizi, thuruh sina giburt, es ist mir, druhtin, thanne thurfT. 5 Firdilo hiar thio dati ioh, druhtin, mih gileiti, thaz ih ni mangolo thes drof, in himilriches frithoF. Rihti pedi mine, thar sin thie druta thine, ioh minaz muat gifreuui mir in euuon, druhtin, mit thiR. In himilriches sconi dua mir thaz gizami, 10 ioh mih io thara uuisi, thoh ih es uuirdig ni sI. Druhtin, duaz thuruh thih: firdanan uueiz ih filu mih, thin gibot ih ofto meid, bi thiu thulta ih thrato manag leiD. Vueiz ih thaz giuuisso, thaz ih thes uurthig uuas ouh so, thiu uuerk firdilo minu ginada, druhtin, thinU. 15 Sario nu giuuaro, thaz ih thir thiono zioro ellu iar innan thes ioh daga mines libeS. Vuanta unser lib scal uuesan thaz, uuir thionost duen io thinaz, thaz huggen thera uuunnu mit Kristes selbes minnV. Vuola sies io ginuzzun, thie uuillen sines flizzun, 20 ioh sint sie nu mit redinu in himilriches freuuidV, In himiles gikamare mit mihilemo gamane mit mihileru liubi, thes uuortes mir giloubI. Zi hellu sint gifiarit ioh thie andere gikerit; thar thultent beh filu heiz, so ih iz allesuuio niuueiZ. 25 Alla uuorolt zeli du al, so man in buachon scal; thiz findistu ana duala, thaz sagen ih thir in uuarA. Nim gouma in alathrati, uuio Abel dati, uuior hugu rihta sinan in selb druhtinaN: Bigonda er gote thankon mit sines selbes uuerkon: 30 sinen uuerkon er io kleib uuiht ungidanes ni bileiB; Vuio ther ander missigiang ioh harto hintorort gifiang, thaz lisist thu ouh zi uuaru ioh fon theru selbun farV: Riat er thes ginuagi, uuio er Abelan sluagi, uuio er gidati filu ser themo einegen bruatheR, 35 Gifreuuit ist ther guato nu in himilriche thrato, thaz deta thero uuerko githig; ther ander nist es uuirthiG. Er ist gilobot harto selben Kristes uuorto, in buachon zi uuare maht selbo iz lesan tharE. Ni bristit, ni thu hortist, uuio leid ther anderer ist, 40 nist ther sin habe ruachon, thaz lisistu ouh in buachoN. Sih Lamech ouh firlos ioh zua quenun erist kos, deta ander ubil ubar thaz, uuant er guater ni uuaS. In imo ist uns thiu forahta, thia uns Cain ouh uuorahta; lis, uuio er then quenonzeinti, ioh selbemo imo irdeiltI. 45 Suntar uuard Enoch in uuar druhtines drut sar; uuanta er uuialt muates sines, nu niuzit paradiseS. Managfalta lera duat druhtin uns in uuara in thesa uuisun untar in; theih hiar thir zelle, thaz firniM. Oba thu es uuola drahtos, in muate thir iz ahtos 50 maht thanne thu giuuaro giniazan bederO. Ni laz thir in muat thih thio dat, thio guoto ni sin, ioh Iaz thir zi bilidin, thie auur bezzirun siN. Allo ziti thanne uabiz untar manne, so niuzis thu, theih zalta, thia fruma managfaltA. 55 Cheri ouh thir in thrati in muat thio uuoladati, uuio Noe bi guat githic uuard druhtine uuirthiC, Hina uuard thiu uuorolt funs, theist allen kund hiar untar uns, in sunton uuard siu missilih giuuisso, thaz nihiluh thiH, Vuas er eino scono in liutin unhono, 60 deta eino er tho zi uuaru uuerk alauuarV. Sih kerta er zi gote ana uuank, tho ellu uuorolt thar irdrank, er eino ther intfloh thaz: thiu uuorolt uuirdig thes niuuaS. Hoh er oba mannon suebeta in then undon, uuant er uuas gote, sumirih, drut, thaz ni hiluh thiH. 65 Allaz mankunni thulta thar tho grunni: uuas uuirdig er in uuara zi bimidanne thia zalA. Rehtor er iz anafiang, tho iz zi noti gigiang, thanne thie mezzon in uuar, (selbo lesen uuir iz thaR). Tho sie thes bigunnun, zi himile gisunnun; 70 uuanta iz uuas unredihaft; bi thiu zigiang in thiu krafT. Muatun sie sih thrato thero iro selbun dato, giuuisso sagen ih thir ein, sie quamun filu scant heiM, Uuanta iz zi thiu io irgengit: ther uuidar gote ringit, ist er io in uuaru in honlicheru zalU. 75 Abraham ther maro uuas gotes drut giuuaro, thoh thult er ofto in uuara managfalta zalA. Thoh riat imo io druhtin mit sines selbes mahtin, sos er io themo duat, ther thionost sinaz uuola duaT. Erata er nan filu fram, tho er zen alten dagon quam, 80 sar bi themo sinde, zi diuremo kindE. Er ouh Iacobe ni sueih, tho er themo bruader insleih, uuas io mit imo thanne in themo fliahannE. Thaz Iosepe ouh giburita, tho er thie drouma sageta: ther selbo nid inan firuuant rumo in anderaz lanT. 85 Uuarun thar in lante thie liuti suintante, in folgetun sie in uuaru mit mihileru pinU. Uuio sie auur got thar drosta ioh Moyses irlosta, thaz sagent buah zi uuaru in sines selbes lerU. Eigun ouh thio buah thaz, then iro mihilan haz, 90 then druagun sie io in uuare unz themo fiarzegusten iarE. Riatun io ubar thaz in thaz ferah sinaz, ther in drost uuas io sar, then uuoltun se ofto irslahan thaR. In Dauides dati nim bilidi zi noti, uuio er thruh sino guati firdruag thaz herotI. 95 Ni mag ih, thoh ih uuolle, thie selbun liuoli alle, thoh uuir thaz iruuellen, so mammonto gizelleN. Bi thiu ist nu baz zi uuare thaz uuiir gigruazen hiare, thaz ouh thaz ni bileib, thaz Iohane ouh hiar kleiB, Erist ahtun sie sin, thaz sagen ih thir in uuar min, 100 fiangun tho mit nide zi selb druhtinE. Riatun tho ginuagi, uuio man nan irsluagi, giuuisso sagen ih thir uuar: thaz irfultun se saR. Tho sie thaz gifrumitun, thie iungoron firiagotun: so uuar sunna lioht leitit so uuurtuin sie zispreitiT, 105 Oba thu es biginnis, in buachon thu iz findis, thaz uuir nu niazen thrato thero druhtines drutO. Sus in thesa uuisun so sleif thiu uuorolt herasun: io ahta, (uuizist thu thaz) thes guaten ther thar ubil uuaS. Aller liut ginoto ahta tho thero druto 110 noh dages hiutu in uuara so uuonet io thiu farA. Nim goumo nu gimuato thero selbun gotes druto, draht es nu mit uuillen in selben sancti GalleN. Chorota er ofto thrato thero selbun arabeito, thes er nu ana uuanc habet fora gote thanC. 115 Thenkemes in muate uns allen nu zi guate, ioh uns harto queme in muat thiz selba druhtines guaT. Ist uns hiar gizeinot in bethen io thuruh not, in ubili inti in guati unseraro zuhto datI. Giuuar thu uuis io thrato thero bezirun dato, 120 biscouuo thir io umbiring ellu thisu uuoroltthinG. Alle thie firdanun, thie unsitig uuarun, thie mid thu io in uuara ioh allero iro farA. Laz thir in muat thin, thie thar bezirun sin, so bistu, so ih thir sagen scal, gotes drut ubaraL. 125 Lis thir in then liuolon thaz selba, theih thir redinon, fon alten zitin hina forn, so sint thie buah al theses foL. In in uuir lesen thare, thaz uuizun uuir zi uuare, thera minna gimuati ioh managfalto guatI Minna thiu diura theist karitas in uuara, 130 bruaderscaf, ih sagen thir ein, thi gileitit unsih heiM. Obo uuir unsih minnon, so birun uuir uuerd mannon, ioh minnot unsih thrato selb druhtin unser guatO. Ni duen uuir so, ih sagen thir ein, sero quimit uns iz heim, serag uuir es uuerthen, in thiu uuir iz ni uuolleN. 135 Altan nid, theih redota> then Cain io habeta, ther si uns leid in uuara, er ist uns mihil zalA. Simes io mit guate zisamane gifuagte, ioh folgemes thes uuares, uuir kind sin AbrahameS. Thia milti, thia Dauid druag, duemes harto uns in thaz muat, 140 thia Moyses unsih Ierit; thia bosa ist ellu niuuihT. Euangelion in uuar thie zeigont uns so sama thar, gibietent uns zi uuare, uuir unsih minnon hiar Redinot er suntar then selben iungoron thar. fon theru minnu managaz er, selbo druhtin unseR: 145 In naht tho er uuolta in morgan bi unsuih selbo irsterban; (duat uns thaz gimuati bi sines selbes guatI), In gibot er harto sines selbes uuorto, thaz man sih minnoti, so er uns iz bilidotI. Mit karitate ih fergon, so bruederscaf ist giuuon, 150 thi unsih scono, so gizam, fon selben Satanase naM, Ofono thio guati, ioh duet mir thaz gimuati, in gibete thrato iues selbes datO. Ni liazet, ni ir gihugget, ioh mir ginada thigget mit minnon filu follen zi selben sancti galleN. 155 Afur thara uuidiri thiu mines selbes nidiri duat iu gihugt, in uuara, thaz ir bimidet zalA, Ci selben sancte Petre, ther so giang in then se, thaz er si uns ginathic, thoh ih ni si es uuirdiC, Hohi er uns thes himiles (ioh muazin freuuen unsih thes) 160 insperre: thara gileite mih ioh thar gifreuue ouh iuiH, In himilisgo sconi, thaz uuir thaz seltsani scouuon thar in uuari, ioh thio euuinigun ziarI Simbolon in euuon thes sint thie siie thar giuuon; uuir muazin freuuen unsih thes iamer sines thankeS! 165 Krist halte Hartmuatan ioh Uuerinbrahtan guatan, mit in si ouh mir gimeini thiu euuiniga heili, Ioh allen io zi gamane themo heilegen gisamane, thie dages ioh nahtes thuruh not thar sancte Gallen thionont!