Glossary

SALOMONI EPISCOPO OTFRIDUS.

Si salida gimuati			Salomones guati, 
   ther biscof ist nu ediles 		Kostinzero sedaleS!
Allo guati gidue, thio sin, 		thio biscofa er thar habetin, 
   ther man zi thiu giladota,		in houbit sinaz zuiualtA! 
5
Lekza ih therera buachi			iu sentu in Suabo richi, 
   thaz ir irkiaset ubaral,		oba siu fruma uuesan scaL. 
Oba ir hiar findet iauuiht thes,	thaz uuirdig ist thes lesannes, 
   iz iuer hugu iruuallo, 		uuisduames follO. 
Mir uuarun thio io uuizzi 		iu ofto filu nuzzi, 
10
   iueraz uuisduam; 			thes duan ih mihilan ruaM. 
Ofto irhugg ih muates			thes managfalten guates, 
   thaz ir mih lertut harto 		iues selbes uuirtO.
Ni thaz mino dohti			giuuerkon thaz io mihti, 
odo in thin thingon			thio huldi so gilangoN:
15
Iz datun gomaheiti,			thio iues selbes guati, 
   iueraz girati,			nales miho datI. 
Emmizigen ubaral			ih druhtin fergon scal; 
   mit lon er iu iz firgelte		ioh sines selbes uuortE
Paradyses festi				gebe in zi gilusti
20
   (ungilonot ni bileip			ther gotes uuizzode kleiP);
In himilriches scone			so uuerde iz iu zi lone 
   mit geltes ginuhti,			thaz ir mir datun zuhtI. 
Sint in thesemo buache,			thes gomo thehein ruache 
   uuortes odo guates			thaz lich iu iues muateS:
25
Cheret thaz in muate			bi thia zuhti iu zi guate 
   ioh zellet thaz ana uuanc		al in iueran thanC.
Ofto uuirdit, oba guat			thes mannes iungoro giduat, 
   thaz es liuuit thrato		ther zuhtari guatO. 
Petrus, ther richo,			lono iu es blidlicho, 
30
   themo zi Romu druhtin grap 		ioh hus inti hof gaP. 
Obana fon himile			sent iu io zi gamane 
   salida gimyato			selbe Krist ther guatO! 
Oba ih irbalden es gidar, 		ni scal ih iz firlazan ouh al
   nub ih io bi uih gerno		ginada sina fergO,
35
Thaz hoh er iuo uuirdi			mit sines selbes huldi 
   ioh iu festino in thaz muat		thaz sinaz managfalta guaT; 
Firlihe iu sines riches,		thes hohen himilriches, 
  bi thaz ther guato hiar io uuiaf	ioh emmizen zi gote riaF; 
Rihte iue pedi thara frua 		ioh mih gifuage tharazua, 
40
   thaz uuir unsih freuuen thar		thaz gotes euuiniga iaR, 
In himile unsih bliden,			thaz uuizi uuir bimiden. 
   ioh due uns thaz gimuati		thuruh thio sino guatI!
Due uns thaz zi guate			blidemo muate! 
   mit heilu er giboran uuard,		ther thia salida fanD, 
45
Vuanta es ni bristit furdir,		thes giloube man mir, 
   nirfreuue sih mit muatu		iamer thar mit guatU. 
Selbe Krist ther guato			firliche uns hiar gimyato, 
   uuir iamer fro sin muates		thes euuinigen guateS!

Glossary