De Stella et adventu magorum. Nist man nihein in uuorolti, thaz saman al irsageti, uuio manag uuuntar vuurti zi theru druhtines giburti. Bi thiu thaz ih irdualta, thar forna ni gizalta, scal ih iz mit uuillen nu sumaz hiar irzellen. 5 Tho druhtin Krist giboran uuard, (thes mera ih sagen nu ni tharf), Thaz ouh gidan uuurti, si in euuon ni firvuurti (iz uuas iru anan henti, tho det es druhtin enti): Tho quamun ostana in thaz lant thie irkantun sunnun fart, 10 sterrono girusti: thaz uuarun iro listi, Sie eiscotun thes kindes sario thes sinthes, ioh kundtun ouh tho mari, thaz er ther kuning uuari; Uuarun fragenti, uuar er giboran uuurti, ioh batun io zi noti, man in iz zeigoti. 15 Sie zaltun seltsani ioh zeichan filu uuahi, uuuntar filu hebigaz (uuanta er ni horta man thaz, Thaz io fon magadburti man giboran vuurti) inti ouh zeichan sin sconaz in himile so scinaz; Sagetun, thaz sie gahun sterron einan sahun, 20 ioh datun filu mari, thaz er sin uuari: 'Uuir sahun sinan sterron, thoh uuir thera burgi irron, ioh quamun, thaz uuir batotin, ginada sino thigitin. Ostar filu ferro so scin uns ouh ther sterro; ist iaman hiar in lante es iauuiht thoh firstante? 25 Gistirri zaltun uuir io, ni sahun uuir nan er io: bithiu birun uuir nu gieinot, er niuuan kuning zeinot. So scribun uns in lante man in uuorolti alte; thaz ir uns ouh gizellet, uuio iz iuuo buah singent'. So thisu uuort tho gahun then kuning ana quamun, 30 hintarquam er harto thero selbero uuorto, Ioh manniliches houbit uuard es thar gidruabit: gihortun ungerno thaz uuir nu niazen gerno. Thie buachara ouh tho thare gisamanota er sare, sie uuas er fragenti, uuar Krist giboran uurti; 35 Er sprah zen euuarton selben thesen uuorton. gab armer ioh ther richo antuurti gilicho. Thia burg nantun se sar, in festiz datun alauuar mit uuorton then er thie altun forasagon zaltun. So er giuuisso thar bifand, uuar druhtin Krist giboran uuard, 40 thaht er sar in festi mihilo unkusti. Zi imo er ouh tho ladota thie uuisun man theih sageta, mit in gistuant er thingon ioh filu halingon. Thia zit eiscota er fon in, so ther sterro giuuon uuas queman zi in, bat sie iz ouh biruahtin, bi thaz selba klnd irsuahtin. 45 'Giduet mih', quad er, 'anauuart bi thes sterren fart, so faret, eiscot thare bi thaz kind sare. Sin eiscot iolicho ioh filu giuuaralicho, sliumo duet ouh thanne iz mir zi uuizzanne. Ih uuillu faran beton nan (so riet mir filu manag man), 50 thaz ih tharzua githinge ioh imo ouh geba bringe.' Loug ther uuenego man: er uuankota thar filu fram; er uuolta nan irthuesben ioh uns thia fruma irlesgen. - Thaz imbot sie gihortun ioh iro ferti iltun; yrscein in sar tho ferro ther seltsano sterro. 55 Sie blidtun sih es gahun, sar sie nan sahun, ioh filu frauualicho sin uuartetun gilicho. Leit er sie tho scono thar uuas thaz kind frono, mit sineru ferti uuas er iz zeigonti. Thaz hus sie tho gisahun ioh sar thara in quamun, 60 thar uuas ther sun guater mit sineru muater. Fialun sie tho framhald, thes guates uuarun sie bald, thaz kind sie thar tho betotun ioh huldi sino thigitun. Indatun sie tho thare thaz iro dreso sare, rehtes sie githahtun, thaz sie imo geba brahtun: 65 Myrrun inti uuirouh ioh gold scinantaz ouh, geba filu mara: sie suahtun sine uuara. Mystice. Ih sagen thir thaz in uuara, sie mohtun bringan mera: thiz uuas sus gibari, theiz geistlichaz uuari. Kundtun sie uns thanne, so uuir firnemen alle, 70 gilouba in girihti in theru uuuntarlichun gifti: Thaz er urmari uns euuarto uuari, ouh kuning in giburti, ioh bi unsih dot uuurti. - Sie uuurtun slafente fon engilon gimanote, in droume sie in zelitun then uueg sie faran scoltun; 75 Thaz sie ouh thes ni thahtin, themo kuninge sih nahtin, noh gikundtin thanne thia fruma themo manne. Tho fuarun thia ginoza andara straza harto ilente zi eiginemo lante.