FUIT IN DIEBUS HERODIS REGIS SACERDOS NOMINE ZACHARIAS. In dagon eines kuninges ioh harto firdanes uuas ein euuarto: zi guate si er ginanto! Zi hiun er mo quenun las, so thar in lante situ uuas, uuanta uuarun thanne thie biscofa einkunne. 5 Uuarun siu bediu gote filu drudiu ioh iogiuuar sinaz gibot fullentaz, Uuizzod sinan io uuirkendan ioh reht minnonti ana meindati. Unbera uuas thiu quena kindo zeizero; 10 so uuarun se unzan elti thaz lib leitenti, Zit uuard tho gireisot, thaz er giangi furi got; opphoron er scolta bi die sino sunta. Zi gote ouh thanne thigiti, thaz er giscouuoti then Iiut, ther ginada tharuze beitota. 15 Thiu heriscaf thes liutes stuant thar uzuuertes, sie uuarun iro henti zi gote heffenti; Sinero eregrehti uuarun thiggenti, thaz er ouh gihorti thaz ther euuarto bati Ingiang er tho skioro, goldo garo ziaro 20 mit zinseru in henti thaz hus rouhenti. Thar gisah er stantan gotes boton sconan zi thes alteres zesauui, uuas sin beitonti. Hintarquam tho harto ther gotes euuarto, intriat er thaz gisiuni, uuant iz uuas filu sconi. 25 Er irbleicheta ioh farauuun er uuanta; ther engil imo zuasprah, tho er nan sciuhen gisah: 'Ni forihti thir, biscof! ih ni terru thir drof, uuanta ist gibet thinaz fon druhtine gihortaz, loh altquena thinu ist thir kind berantiu, 30 sun filu zeizan; Iohannes scal er heizan. Er ist thir herzblidi ioh uuirdit filu mari, ist sineru giburti sih uuorolt mendenti. Guati so ist er hoher ioh gote filu liuber, ist er ouh fon iugendi filu fastenti 35 Ni fullit er sih uuines ouh lides niheines; fon reue thera muater so ist er io giuuihter. Filu thesses liutes in abuh irrentes ist er zi gotes henti uuola cherenti. Er ferit fora Kriste mit selbomo geiste, 40 then iu in altuuorolti Helias uuas ouh habenti. Gikerit er skono thaz herza fordrono in kindo inbrusti zi gotes analusti Thie ungiloubige gikerit er zi libe, thie dumbon duat ouh thanne zi uuisemo manne, 45 Zi thiu thaz er gigarauue thie liuti uuirdige, selb druhtine straza zi dretanne.' Tho sprah ther biscof (harto forahta er mo thoh, ni uuas mo anauuani thaz arunti sconi): 'Chumig bin ih iaro iu filu manegero, 50 ioh thiu quena minu ist kindes urminnu. Uns sint kind zi beranne iu daga furifarane; altduam suaraz duit uns iz uruuanaz. Iz habet ubarstigana in uns iugund managa, ni gibit uns thaz alta, thaz thiu iugund scolta.' 55 'Uuio mag ih uuizan thanne, thaz uns kind uuerde? int uns ist iz in ther elti binoman unz in enti'. Sprah ther gotes boto tho, (ni thoh irbolgono), uuas er mo auur sagenti thaz selba arunti: 'Ih bin ein thero sibino thero gotes drutbotono, 60 thie in sineru gisihti sint io stantenti; Thi er hera in uuorolt sentit, thann er kraft uuirkit ioh uuerk filu hebigu ist iru kundentu. Sant er mih fon himile, thiz selba thir zi saganne, fon himilriches hohi, theih thir iz uuisdati. 65 Nu thu thaz arunti so harto bist firmonanti nu uuird thu stummer sar, unz thuz gisehes alauuar; Uuanta thu abahonti bist gotes arunti int ouh thaz bist firsagenti, thaz selbo got ist gebenti; Iz uuirdit thoh irfallit, so got gisazta thia zit, 70 unz thaz tharbe harto thero thinero uuorto.' Uze stuant ther Iiut thar, uuas sie filu uuuntar, ziu ther euuarto dualeti so harto, Gibetes antfangi fon gote ni gisageti, mit sineru henti sie ouh uuari uuihenti. 75 Giang er uz tho spato, hintarqueman thrato: theru spracha er bilemit uuas, uuant er giloubig ni uuas. Tho uuas er bouhnenti, nales sprechenti, thaz menigi thes liutes fuari heimortes. Sie fuarun drurenti ioh ouh tho ahtonti, 80 uuant er uuiht zin ni sprah thaz er thaz uuuntar gisah. Thes oppheres ziti uuarun entonti, fuar er ouh tho sare zi sinemo gifuare. Thera spracha mornenti: thes uuanes uuas sih freuuenti; giloubt er filu spato, bi thiu beitota er so noto. 85 Thiu quena sun uuas dragenti ioh sih harto scamenti, thaz siu scolta in elti mit kinde gan in henti.