EXURGENS AUTEM MARIA ABIIT IN MONTANA CUM FESTINATIONE. Fuar tho sancta Maria, thiarna thiu mara, mit ilu ioh mit minnu zi ther iru maginnu. So si in ira hus giang, thiu uuirtun sia erlicho intfiang, ioh spilota in theru muater ther ira sun guater. 5 Sprah thiu sin muater: 'heil, uuih dohter, uuola uuard thih lebenti ioh giloubenti! Giuuihit bistu in uuibon ioh untar uuoroltmagadon ist furist alles uuihes uuahsmo reues thines. Uuio uuard ih io so uuirdig fora druhtine, 10 thaz selba muater sin giangi innan hus min? So sliumo so ih gihorta thia stimmun thina, so blidta sih ingegin thir thaz min kind innan mir. Allo uuihi in uuorolti thir gotes boto sageti, sie quement so gimeinit, ubar thin houbit!' 15 Nu singemes alle mannolih bi barne: uuola, kind diuri, forasago mari! Uuola, kind diuri, forasago mari! ia kundt er uns thia heili, er er giboran uuari.